Ragnheiður Jónsdóttir | apríl. 10. 2014 | 11:00

The Masters 2014: 10 kylfingar sem er vert að fylgjast með á 1. degi

Nr. 8 á heimslistanum, Justin Rose segir í grein sem birtist í gær á Golf 1 að sér þyki 15 kylfingar sigurstranglegastir á The Masters 2014 þó alltaf geti einhver óvæntur sigrað á risamótum.  Þá skipti kunnáttan á Augusta National mestu og því þyki sér reynsluboltarnir sigurstranglegastir, hvað sem líður allri velgengni þeirra sem hátt eru skrifaðir.

Sagt hefir verið að ekki sé hægt að sigra á risamóti á 1. degi – hins vegar sé hægt að tapa risamóti þegar á 1. degi og því eru skor eftir 1. dag risamóts sem The Masters alltaf athygliverð.

Hér verður gefinn upp listi 10 kylfinga, sem hátt eru skrifaðir og taldir líklegir sigurvegarar á The Masters í ár.  Fróðlegt verður að fylgjast með hversu margir þeirra verða raunverulega meðal efstu 10.  Þessir kylfingar eru eftirfarandi:

Nr. 1  Phil Mickelson (eða Phil the Thrill eins og hann er kallaður af áhangendum sínum).

Nr. 5 á heimslistanum (Phil) hefir ekkert gengið sérlega vel í ár og segist stressaður að fara inn í The Masters.  Hann hefir ótrúlega hæfileika að bjarga sér úr slæmri legu, en það eitt nægir ekki til að sigra á The Masters – hins vegar er Phill svo sannarlega reynslubolti og einn af þeim sem Rose þykja sigurstranglegur, en hann hefir þar að auki þrívegis áður sigrað á The Masters (2004, 2006 og 2010). Hann veit hvað til þarf að sigra á the Masters og þar að auki er „slétt ár“ í ár en Phil hefir alltaf sigrað á árum með sléttri tölu! Phil er auk þess einn alvinsælasti kylfingur Bandaríkjanna og á sérlega stóran stuðningshóp á Augusta National

Nr. 2 Rory McIlory

Flestir veðbankar spá Rory sigri. Hann á þó að baki eitt alerfiðasta ár á ferli sínum þar sem hann m.a. skipti um golfútbúnað og virðist rétt aftur vera að rétta úr kútnum og er rétt aftur farinn að sjást í efri hluta skortaflna í mótum. Hann var um tíma nr. 1 á heimslistanum en er nú dottinn niður heimslistann í 9. sætið.  Sigur á the Masters myndi skjóta honum ofar á heimslistann!

Nr. 3 Adam Scott

Scott á titil að verja. Hann hefir verið að spila vel undanfarið og segir sjálfan sig fullan sjálfstrausts. Hann á líka frábærar minningar af mótinu frá því í fyrra. Lykillinn að velgengni nr. 2 á heimslistanum, (Scott) verður líklega hversu vel honum farnast með langa pútternum sínum á flughálum flötum Augusta National. Sigri hann í mótinu á hann auk þess stóran sjéns á að velta Tiger úr 1. sæti heimslistans.

Nr. 4  Jason Day

Nr. 4 á heimslistanum (Jason Day) hefir átt mikilli velgengni að fagna á s.l. árum á the Masters, í tveimur af síðustu 3 Masters-mótum hefir Day þannig verið með árangur upp á T-2 (þ.e. hann deildi 2. sætinu í annað sinn) og varð í 3. sæti hitt skiptið. Hann er núverandi heimsmeistari í holukeppni – sigraði s.s. allir muna  World Golf Championships-Accenture Match Play Championship. Það skiptir þó ekki öllu heldur kunnátta hans og reynsla af Augusta National.  Það eina sem setur svolítið strik í reikninginn er að Day hefir verið meiddur á þumli og það gæti skipt máli – a.m.k. verður mjög spennandi að fylgjast með Day í ár! Tekst Ástrala að vinna The Masters 2. árið í röð – verður Masters-bikarinn áfram í Ástralíu?

Nr. 5 Jordan Spieth

Miklar væntingar eru gerðar til  nr. 13 á heimslistanum (Spieth) sem verið hefir að spila eins og engill! Það er margt sem hann hefir áorkað á stuttum ferli. m.a. hefir hann halað inn fyrsta sigri sínum á PGA Tour (John Deere Classic, 14. júlí 2013) og verið í Forsetabikarsliði Bandaríkjanna. Hins vegar er hann einn af 24 nýliðum á Masters í ár og því óskrifað blað.  Það sem helst gæti reynst honum erfitt er andlegi hluti leiksins, en Spieth er skapheitur, tilfinningakylfingur og Augusta National krefst þolinmæði!

Nr. 6 Jimmy Walker

Jimmy Walker hefir átt ótrúlegri velgengni að fagna á PGA Tour á þessu keppnistímabili en líkt og Spieth er hann einn af 24 nýliðum, þ.e. einn af þeim sem eru að keppa á The Masters í fyrsta sinn.  En Walker á þó í beltinu 3 sigra á PGA Tour á þessu keppnistímabili.   Þannig að spurningin er hvort honum það nýtist honum eða hvort taugarnar fari með hann  þetta  fyrsta sinn, sem hann spilar  á Augusta.

Nr. 7 Patrick Reed

Líkt og Spieth og Walker er Reed einn af þeim sem vakið hefir athygli á sér tiltölulega nýlega.  Hann á líka 3 nýlega sigra á PGA Tour og hefir auk þess lýst því yfir að hann finnist hann eiga heima meðal 5 bestu kylfinga heims (Reed er í 23. sæti heimslistans – var í 73. sæti í ársbyrjun!) Hann hefir eitt fram yfir hina 23 nýliðana á the Masters í ár, en hann þekkir Augusta National út og inn frá því hann var við nám í Augusta State College og fékk að leika völlinn.

Nr. 8 Brandt Snedeker

Snedeker hefir gengið vel á The Masters m.a. verið í 3. og 6. sæti í mótinu. Hann gæti svo sannarlega komið á óvart, þó púttin (sem eru svo sérstaklega nauðsynleg á The Masters) hafi verið að stríða honum undanfarið.  Hann er einn af reynsluboltunum – þekkir Augusta National, sem er líka mikilvægt.

Nr. 9 Sergio Garcia

Verður þetta mót Garcia?  Þessum skapheita Spánverja hefir ekkert gengið í risamótum en þetta Mastersmót er 61. risamótið, sem hann tekur þátt í án sigurs. Hann lét hafa eftir sér að hann gæti bara ekki sigrað á the Masters.  Að undanförnu höfum við séð „bættan“ Garcia, sem m.a. situr í 6. sæti heimslistans.  Ef honum tekst að hafa stjórn á skapmunum sínum og sýna þolinmæði gæti Sergio sigrað!  A.m.k. þekkir Garcia Augusta National og var m.a. meðal efstu 10 í fyrra!

Nr. 10 Bubba Watson

Hér verður að lokum getið Watson, sem sigraði svo eftirminnilega á The Masters 2012!  Hann hefir reynsluna, þekkir Augusta og er snillingur í að móta högg, sem er gríðarlega mikilvægt á Augusta. Það eina sem gæti gert honum erfitt fyrir er blómaofnæmi, sem hann er með, en ógrynni er af þeim á Augusta National eins og allir vita!