Viðtal við Íslandsmeistarann í höggleik 2012 – Harald Franklín Magnús

Haraldur Franklín Magnús, Íslandsmeistari í höggleik 2012 er vinsæll maður meðal GR-inga, sérstaklega þessa dagana. Þegar Haraldur Franklín kom í stutt viðtal hjá Golf 1, í Korpunni, þar sem talað skyldi um sigur hans á Strandarvelli, var hann faðmaður og knúsaður af þeim sem á staðnum voru. Einn sagði: „Þetta er æðislegt; ég fór að gráta.“  Þannig er eflaust mörgum GR-ingum innanbrjósts…. en Haraldur Franklín er fyrsti GR-ingurinn til þess að vinna Íslandsmeistaratitil í höggleik, í karlaflokki, í 27 löng ár eða allt frá árinu 1985, þegar Sigurður Pétursson vann. Margir komust við og voru hrærðir. Og sá sem er hetja GR-inga og valdur að allri gleðinni er Haraldur Franklín.   Hér fer stutt viðtal við Íslandsmeistara GR-inga í höggleik 2012, Harald Franklín Magnús:

Haraldur Franklín Magnús, GR, á 18. flöt Strandarvallar 29. júlí 2012. Mynd: gsimyndir.net

Golf 1: Haraldur til hamingju með að verða klúbbmeistari GR í ár og jafnframt að hljóta Íslandsmeistaratitilinn í holukeppni og nú Íslandsmeistaratitilinn í höggleik 2012.

Haraldur Franklín: Takk fyrir. Þetta er búið að vera gott sumar.

Golf 1: Nú er tæp vika liðin frá sögulegum sigri þínum á Strandarvelli. Í viðtali við Golf 1 fyrir mótið sagðir þú að Íslandsmótið í höggleik væri aðalmótið og þú ætlaðir að sigra. Þú stóðst við það. Hvað er þér efst í huga þegar þú horfir aftur til s.l. sunnudags?

Haraldur Franklín: Bara að hafa unnið.

Golf 1: Svona á persónulegum nótum hvernig kylfingur ertu? Djarfur og tekur áhættur eða varkár?

Haraldur Franklín: Bæði og. Það fer eftir völlum og eftir því á hverju hinir eru. Á Strandarvelli var ég varkár á lokahringnum. (Innskot: Haraldur spilaði lokahringinn á 68 höggum 2 undir pari – skilaði „hreinu“ skorkorti með 2 fuglum og 16 pörum).

Sigurinn í höfn!!! Mynd: gsimyndir.net

Golf 1:  Já, snúum okkur að lokahringnum á Íslandsmótinu í höggleik á Strandarvelli, á Hellu. Nú snerist leikurinn á 16. braut. Þú fékkst fugl og Rúnar skolla og þú kominn í 1 höggs forystu. Hvað varstu að hugsa á 16. flöt?

Haraldur Franklín: Ég vildi hafa eins mikla pressu á hinum og hægt var. Ég reyndi að slá höggið á 17. eins fljótt og ég gat – þá vill oft koma meiri pressa á hina. Þannig að ég var með pínu sálfræði á hina.

Golf 1: Og hvað varstu að hugsa á 18. teig á Strandarvelli?

Haraldur Franklín:   Að hitta brautina. Hún er erfið.  Ég sló ekki fast heldur ætlaði mér bara að vera á braut.

Golf 1: Hvað með aðhöggið að 18. flöt?

Haraldur Franklín: Teighöggið lenti á besta stað og ég tók fullan lob-wedge fyrir aðhöggið, en bjóst ekki við að hann myndi koma svona mikið tilbaka.Ég ætlaði að hafa hann ágætlega nálægt þannig að ég ætti birdiepútt eftir og væri helst nær pinna en Rúnar.

Íslandsmeistarar GR í höggleik t.v.: Haraldur Franklín Magnús, GR, Íslandsmeistari í höggleik 2012 og t.h. Sigurður Pétursson, GR Íslandsmeistari í höggleik 1985. Mynd: gsimyndir.is

Golf 1: Hvernig var tilfinningin þegar þér varð ljóst að þú hafðir unnið?

Haraldur Franklín: Þetta var spennufall; ég var þvílíkt spenntur á síðustu holunum.

Golf 1: Hver eru markmiðin það sem eftir er sumars?

Haraldur Franklín: Ég tek þátt í sveitakeppninni en ekki þeim 2 mótum sem eftir eru á Eimskipsmótaröðinni því ég er að fara í háskólagolfið í Bandaríkjunum. Aðalmarkmiðið er sigur í sveitakeppninni – við ætlum allir að vinna hana aftur 3. árið í röð.

Golf 1: Af hverju valdirðu Mississippi State?

Haraldur Franklín:  Ég skoðaði marga skóla. Þetta er mikill íþróttaskóli, með sterkt lið, þar sem er mikil samkeppni og ég fæ að fara í sterk mót. Svo er líka Íslendingur í liðinu, Axel Bóasson, GK (INNSKOT: Íslandsmeistari í höggleik 2011). Við þekkjumst vel.

Golf 1: Að lokum: Hvað er „góður kylfingur“ í þínum huga?

Haraldur Franklín: Það er sá sem gerir fá mistök á vellinum og er alltaf ofarlega í mótum.