Viðtalið: Guðmundur Arason, GR & GÖ.

Viðtalið í dag er við einn færasta lækni landsins. Hér fer viðtalið:

Fullt nafn: Guðmundur Arason.

Klúbbur: GR og GÖ.

Hvar og hvenær fæddistu?  Ég fæddist í Reykjavík,  26. júlí 1956.

Hvar ertu alinn upp? Í Reykjavík.

Hverjar eru fjölskylduaðstæður og spilar einhver í fjölskyldunni golf? Ég er kvæntur og á 3 börn.  Konan mín og elsti strákurinn minn eru í golfi.

Hvenær byrjaðir þú í golfi?  26 ára.

Hvað varð til þess að þú byrjaðir í golfi?  Ég hafði verið í knattspyrnu og sá fram á að það myndi ekki endast. Því  leitaði ég að íþrótt sem maður gæti verið í fram eftir aldri og þá prufaði ég golfið.

Hvað starfar þú? Ég er læknir.

Hvort líkar þér betur við skógar- eða strandvelli?  Strandvelli vegna þess að þar er minna af trjám.

Hvort líkar þér betur holukeppni eða höggleikur? Maður er svo sjaldan í holukeppni – en hún er meira spennandi.

Hver er uppáhaldsgolfvöllur/vellir á Íslandi?  Grafarholtið.

Frá Grafarholtinu uppáhaldsvelli Guðmundar á Íslandi. Mynd: Golf 1.

Hver er uppáhaldsgolfvöllur/vellir hvar sem er í heiminum?  Bethpage Black. (Þar fóru US Open 2002 og 2009 fram og Barclays mótið fer þar fram nú í ár.  Þetta var heimavöllur Guðmundar, meðan hann bjó í New York)

Bethpage Black – uppáhaldsgolfvöllur Guðmundar.

Hver er sérstæðasti golfvöllur sem þú hefir spilað á og af hverju?  Geysisvöllur vegna þess að þar er mjög sérstakt layout, fallegt og þröngt, sem verðlaunar beinskeytta kylfinga.

Hvað ertu með í forgjöf?  9,1.

Hvert er lægsta skorið þitt í golfi og hvar/á hvaða velli náðir þú því?   Ætli það hafi ekki verið hér á Íslandi Korpunni, 76 högg. Á þessu ári eru það 78 högg á Eagle Creek, í Flórída.

Hvert er lengsta drævið þitt?  Það hefir aldrei verið mælt.

Hvert er helsta afrekið þitt til dagsins í dag í golfinu?  Að spila Pebble Beach undir 100.

Hefir þú farið holu í höggi?  Nei.

Hvaða nesti ertu með í pokanum?   Banana og vatn.

Hefir þú tekið þátt í öðrum íþróttum?  Ég spilaði fótbolta með Víking til 19 ára aldurs.

Hver er uppáhaldsmaturinn þinn, uppáhaldsdrykkur, uppáhaldstónlist, uppáhaldskvikmynd og uppáhaldsbók?  Uppáhaldsmaturinn er nautalund; uppáhaldsdrykkurinn er Margaríta; uppáhaldstónlistin er allt með Rolling Stones; uppáhaldskvikmyndin er  Life is beautiful (Ít.: La vita è bella (1997) Leikstj.: Roberto Benigni og uppáhaldsbókin er  „Þetta er allt að koma” eftir Hallgrím Helgason.

Hver er uppáhaldskylfingurinn þinn nefndu 1 kvenkylfing og 1 karlkylfing?   Kvk.: Konan mín.  Kk:  Luke Donald.

Hvert er draumahollið?  Luke Donald, Tiger Woods (í fourball) á móti mér og Steini Jónssyni.

Hvað er í pokanum hjá þér og hver er uppáhaldskylfan þín?  Í pokanum hjá mér er TaylorMade dræver og 3-tré ;  TM járn PW-3, wedgar og Ping Answer pútter. Uppáhaldskylfan er sandwedge-ið.

Hefir þú verið hjá golfkennara? Já, Sigga P. og Úlfari Jóns og svo var ég hjá Ashley Northridge golfkennara Arcos Gardens.

Ertu hjátrúarfullur?  Nei.

Hvert er meginmarkmið í golfinu og í lífinu? Að hafa gaman í golfinu og að njóta lífsins.

Hvað finnst þér best við golfið?   Það er svo krefjandi.

Hversu há prósenta af golfinu hjá þér er andleg (í keppnum)?  90%.

Ertu með gott ráð sem þú getur gefið kylfingum?     Já, að vera ekki að hugsa um lélegu höggin.

Spurning frá síðasta kylfingi, sem var í viðtali hjá Golf 1 (Andra Þór Björnssyni, klúbbmeistara GR 2011): Hvort myndir þú frekar vilja vinna Masters eða Opna breska (Spilað á St. Andrews)?

Svar Guðmundar:  Opna breska, vegna þess að þar er spilað á skemmtilegum strandvöllum.

Geturðu komið með spurningu fyrir næsta kylfing?

Spurning Guðmundar: Tínirðu rusl upp af golfvelli? – Fólk gengur oft framhjá rusli.