Ragnheiður Jónsdóttir | maí. 8. 2014 | 20:00

Viðtalið: Pétur Sigurdór Pálsson, GHG

Viðtalið í kvöld er við 12 ára sigurvegara Jaxlamóts Steingríms.  Hann hefir þrátt fyrir ungan aldur verið sigursæll m.a. á meistaramóti í klúbbnum sínum, GHG  og á Suðurlandsmótaröð barna og unglinga. Hér fer viðtalið:

Fullt nafn:  Pétur Sigurdór Pálsson.

Klúbbur:   Golfklúbbur Hveragerðis (GHG). 

Hvar og hvenær fæddistu?   Í Reykjavík 8. janúar 2002.

Hvar ertu alinn upp? Í Hafnarfirði til 5 ára aldurs og Hveragerði til dagsins í dag.

Í hvaða starfi/námi ertu?  Grunnskólanum í Hveragerði.

Hverjar eru fjölskylduaðstæður og spilar einhver í fjölskyldunni golf?   Pabbi (Páll Sveinsson fgj. 11) og mamma (Arndís Mogensen fgj. 26) spila golf, Matthías eldri bróðir minn æfði en er hættur og kominn í tónlistina og litla systir mín , Rúrý 5 ára er byrjuð að slá!

Hvenær byrjaðir þú í golfi? Ég byrjaði að slá þriggja ára á æfingasvæðinu við Setbergsvöll í Hafnarfirði.

Hvað varð til þess að þú byrjaðir í golfi?  Pabbi var að byrja og tók mig með. Mér fannst þetta svolítið gaman.

Hvort líkar þér betur við skógar- eða strandvelli?   Skógarvelli.

Hvort líkar þér betur holukeppni eða höggleikur?    Holukeppni.

Hver er uppáhaldsgolfvöllur/vellir á Íslandi?    Hlíðarvöllur í Mosfellsbæ.

Hefir þú spilað alla velli á Íslandi – ef ekki hversu marga hefir þú spilað?  Ég hef spilað 14 velli á landinu.

Hver er uppáhaldsgolfvöllur/vellir hvar sem er í heiminum?   Mig langar mest að spila Pebble Beach.

Hver er sérstæðasti golfvöllur sem þú hefir spilað á og af hverju?  Vestmannaeyjavöllurinn vegna umhverfisins, fjallanna og sjávarins…

Hvað ertu með í forgjöf?  22,2.

Hvert er lægsta skorið þitt í golfi og hvar/á hvaða velli náðir þú því?    87 á 18 holum á Hlíðarvelli Mosfellsbæ og 41 á 9 holum í Gufudal Hveragerði.

Hvert er helsta afrekið þitt til dagsins í dag í golfinu?   Suðurlandsmeistari í 12 ára og yngri 2013, sigurvegari á Jaxlamóti GHG 2014, sigurvegari í Meistaramóti GHG 2013 12 ára og yngri.

Hefir þú farið holu í höggi?   Já, á 4. braut á par-3 vellinum á Hótel Örk, Hveragerði.

Spilar þú vetrargolf?  Stundum með pabba.

Hvaða nesti ertu með í pokanum?   Banana, flatköku með hangikjöti, vatn og Corny stöng.

Hefir þú tekið þátt í öðrum íþróttum?     Já, æfi körfubolta og hef æft fótbolta og badminton.

Hver er uppáhaldsmaturinn þinn?  Plokkfiskur. Uppáhaldsdrykkur? Sódavatn. Uppáhaldstónlist? Muse– Bítlarnir– Pink Floyd – Led Zeppelin– Deep Purple – Lenny Kravitz ofl. Uppáhaldskvikmynd?  Greatest Game Ever Played. Uppáhaldsbók? Hungurleikarnir og Uppáhaldsgolfbók?  Enn betra golf.

Notarðu hanska og ef svo er hverskonar? Já, Footjoy.

Hver er uppáhaldskylfingurinn þinn nefndu 1 kvenkylfing og 1 karlkylfing?   Henrik Stenson og Paula Creamer.

Hvert er draumahollið?   Ég, Henrik Stenson, Ricky Fowler og Rory McIlroy.

Hvað er í pokanum hjá þér og hver er uppáhaldskylfan þín?    Cobra AMP driver, Taylor Made Burner 5 tré, Cleveland Mashie hybrid, Cobra S3 járn, Cobra Trusty Rusty Lob Wedge og Odyssey White Hot #7 pútter. Ég nota yfirleitt Titleist bolta, Mizuno kerrupoka og Big Max kerru. Uppáhaldskylfan er Trusty Rusty lobbarinn!

Hefir þú verið hjá golfkennara – ef svo er hverjum?  Já, Sigga Hafsteins,  Gylfa B. Sigurjóns, Hlyni Geir Hjartarsyni, Einari Lyng og Ingvari Jónssyni.

Hver er besti golfkennari á Íslandi? Allir frábærir en sá fyrsti var Siggi Hafsteins sem ég held svolítið mikið upp á.

Ertu hjátrúarfullur í golfinu og ef svo er hvernig birtist það?    Já, ég set alltaf eitt tí eftir upphafshöggið í boltahólfið!

Hvert er meginmarkmið í golfinu og í lífinu?   Að vera glaður og njóta þess!

Hvað finnst þér best við golfið?   Að vera úti í náttúrunni, hafa gaman og reyna að gera betur en sá sem ég er að spila við!

Hversu há prósenta af golfinu hjá þér er andleg (í keppnum)?    60%,

Ertu með gott ráð sem þú getur gefið kylfingum?   Að einbeita sér og hreinsa hugann eftir léleg högg.