Viðtalið: Sigríður Th. Matthiesen, GR.

Viðtal dagsins er við kylfing, fjórfaldan Íslandsmeistara í íþróttinni, sem mörgum kylfingnum er að góðu kunn – Sigríði Th. Matthíesen. Í sumar hefir hún starfað sem ræsir uppi á Akranesi hjá GL. Hér á eftir fara spurningar Golf 1 og svör Sigríðar:

Nafn: Sigríður Th. Matthíesen.

Klúbbur: GR.

Hvar og hvenær fæddistu? Ég fæddist í Hafnarfirði, 17. mars 1946.

Hvar ertu alin upp? Í Hafnarfirði til 12 ára aldurs en síðan fluttist ég til Reykjavíkur og var 30 ár í Mosfellsbæ.

Fjölskylduaðstæður?  Ég er gift Viktor Inga Sturlaugssyni og við eigum dótturina Júlíönu og soninn Viktor Rafn og 4 barnabörn.

Hvenær byrjaðir þú í golfi? Ég var orðin 43 ára þegar ég byrjaði í golfi.

Hvað varð til þess að þú byrjaðir í golfi? Bóndi minn fór í hjartaaðgerð 45 ára. Hann byrjaði í golfi i í stað þess að labba tilgangslausa göngu úti og ég fylgdi honum, 2 árum eftir að hann byrjaði.

Hvað starfar þú? Ég er ræsir hjá Leyni.

Hvað er í meira uppáhaldi hjá þér skógar- eða strandvöllur?   Skógarvellir.

Hvort líkar þér betur holukeppni eða höggleikur? Höggleik.

Hverjir eru uppáhaldsgolfvöllur/vellir á Íslandi?  Korpan.

Uppáhaldsgolfvöllur/vellir hvar sem er í heiminum og hver er sá sérstakasti sem þú hefir spilað á?  Æi ég veit ekki hvað ég á að segja.

Hvað ertu með í forgjöf?  9,8

Hvert er lægsta skorið þitt í golfi og hvar/á hvaða velli náðir þú því? 74 nokkrum sinnum í Korpu og einu sinni í Grafarholtinu.

Hvert er helsta afrekið þitt til dagsins í dag í golfinu?  Íslandsmeistaratitlar 4 sinnum í öldungaflokkum.

Hvaða nesti ertu með í pokanum? Ég er með voðalega lítið af svoleiðis – helst banana.

Hefur þú tekið þátt í öðrum íþróttum? Nei aldrei og ég skrópaði í leikfimi meðan ég var í skóla.

Hver er uppáhaldsmaturinn þinn,uppáhaldsdrykkur, uppáhaldstónlist, uppáhaldskvikmynd og uppáhaldsbók? Uppáhaldsmaturinn minn er lambakjöt og drykkur: vatn. Varðandi tónlistina get ég ekki gert upp á milli, það er bara allt mögulegt; ég veit ekki hvað ég á að segja varðandi bókina og hvað kvikmyndina snertir þá hef ég bara ekki farið í bíó lengi og horfi ákaflega lítið á sjónvarp.

Hver er uppáhaldskylfingurinn þinn nefndu 1 kvenkylfing og 1 karlkylfing? Kvk.:  Ragga Sig. Kk.: Tigerinn – hann er langsætastur.

Hver er uppáhaldskylfan þín?  5-tréð – Mér hefir alltaf gengið vel með hana.

Hvert er meginmarkmiðið í lífinu?  Að reyna að koma almennilega fram við fólk.

Hvað finnst þér best við golfið? Skemmtunin af því að vera úti á velli að spila golf.

Hvað er í pokanum hjá þér? Kylfurnar pútterinn, kúlur og tíin ekki mikið meira.

Ertu hjátrúarfull í golfinu? Nei, ég er ekki hjátrúarfull.

Hefir þú verið hjá golfkennara? Já, ég fer annaðslagið til kennara. Ég hef mest verið hjá David Barnwell. Ég hef verið hjá Brynjari og aðeins hjá Röggu.

Nú hefir þú séð tímanna tvenna í golfinu – hvað hefir breyst? Nú það hefir bara orðið algjör sprengja – það eru svo margir sem stunda íþróttina núna. Þegar ég er að byrja, þá æfi ég mig á sveitavellinum Korpunni.  Í dag þá er fólk með „outfittið“ og græjur í lagi en menn kunna margir ekki reglurnar og að spila. Það er allt of mikið af fólki inni á alvöruvöllum, sem ætti að æfa sig á öðrum. Síðan eru golfvellirnir hér orðnir miklu betri og það er orðið mikið úrval af góðum völlum.

Að lokum ert þú með eitthvert gott ráð til kylfinga? Já maður verður að sýna þessu þolinmæði – maður getur ekkert á fyrsta degi. Það verður bara að hafa gaman af því að fara út – já, það er nr. 1, 2 og 3 að hafa gaman af þessu.