13 kvenstjörnur golfsins nr. 4: Donna Caponi-Byrnes

Donna Caponi-Byrnes fæddist 29. janúar 1945 í Detroit, Michigan. Sem dóttir golfkennara byjaði Donna að spila golf 8 ára og fékk þátttökurétt á LPGA mótaröðinni, 20 ára. Það tók Donnu 4 ár að knýja fram fyrsta sigur sinn, en hún gerði það með stæl, sigraði á einu af risamótum kvennagolfsins, US Women´s Open. Hún vann með 1 höggi, eftir dramatískan lokahring, með skor upp á 69 högg, þ.á.m. fugl á lokaholunni, sem hún þurfti til sigurs. Aðeins Mickey Wright hafði sigrað á US Women´s Open tvö ár í röð, þegar Donna endurtók leikinn ári síðar, 1970 og sigraði aftur á US Women´s Open, en nú jafnaði hún einnig annað met sem Mickey átti, þ.e. að spila 72 holurnar á 287 höggum.

Alls hefir Donna unnið í 24 skipti á LPGA mótaröðinni, þ.á.m. á 4 risamótum – hin risamótin sem hún vann eru LPGA Championship, sem hún vann 1979 og 1981. Besti árangur Donnu í öðrum risamótum kvennagolfsins eru T-13 á Kraft Nabisco, 1985 og tvívegis varð hún í 3. sæti á du Maurier Classic, 1980 og 1982.

Alls á Donna að baki 29 sigra sem atvinnukylfingur. Hinir sigrar hennar utan LPGA eru:

1975 Colgate European Open

1976 Wills Quantas Australian Ladies Open

1978 Ping Classic Team Championship (ásamt Kathy Whitworth)

1980 Portland Ping Team Championship (ásamt Kathy Whitworth)

1981Portland Ping Team Championship (ásamt Kathy Whitworth)

Donna var meðal topp 10 á peningalistanum 10 sinnum á árunum milli 1968 og 1981, þ.á.m. varð hún tvívegis í 2. sæti þ.e. á árunum 1976 og 1980. Donna Caponi Byrne var tekin í frægðarhöll kylfinga árið 2001.

Donna er í dag gift kærasta sínum til langs tíma, Edward “Ted” Byrnes (en þau giftu sig 29. júlí 2006). Hún starfar sem golffréttamaður á Golf Channel þar sem hún sér um allt viðvíkjandi Champions Tour. Golfklúbburinn sem Donna er félagi í er Ferncroft Country Club í Middleton, Massachusetts.