PGA: Rahm sló næstum því í ungabarn á The Players

Spænski kylfingurinn Jon Rahm, sem var í forystu fyrir lokahring The Players átti martraðarlokahring upp á 4 yfir pari, 76 högg og lauk keppni T-12 … en það hefði s.s. getað verið verra fyrir hann.

Hann sló t.a.m. aðhögg á par-4 4. holunni sem hitti áhorfanda… og jafnvel það hefði getað orðið verra fyrir hann.

Boltinn hitti áhorfandann í brjóstið … en við hliðina á honum var kona sem hélt á ungabarni og fyrir aftan hann var smábarn í kerru (sjá mynd).

Ýmsir fréttamiðlar bentu á að maðurinn sem fékk boltann frá Rahm í brjóstið hafi verið svo hraustur að hann hafi ekki misst bjórglas sitt en segja má það hreina heppni að ekki fór verr … að hann stóð þarna eins og mannlegur skjöldur fyrir börnin, en hefði högg Rahm farið í þau er ekki sökum að spyrja.

Rahm fór yfir til áhorfandans til þess að biðjast afsökunar og hann áritaði golfhanska fyrir hann og faðmaði hann að sér, dauðfeginn að ekki fór verr. Hins vegar náði Rahm sér ekki á hringnum. Hann fékk 3. skolla sinn á fyrstu fjórum holunum, sem lauk í skori upp á 1 yfir pari, 37 höggum á fyrstu 9.