Smá golfgrín 2. í páskum

NAUÐSYNLEGAR UPPLÝSINGAR TIL GOLFSPILARA VEGNA COVID-19 FARALDURSINS

Eftirtaldar reglur hafa tekið gildi vegna Covid-19 faraldursins:
Pöntunarsími golfklúbba á Íslandi er 1700. Við biðjum ykkur vinsamlegast ekki að mæta á golfvellina. Hringja á undan sér og við látum þig vita hvort þið megið mæta.
Allir kylfingar skulu hafa Tý með sér. Hægt er að finna Tý í þjóðskránni, þó ekki Tý Þórarinsson á Njálsgötunni, hann vill ekki vera með.
Andlitsgrímur, uppþvottahanskar og skurðbúningar flokkast nú til golfklæðnaðar. Golfmaðurinn við Síðumúla, sem frændi minn rekur, selur einn golfbúða slíkan búnað. Einnig skal áréttað að verslunin Tiger í Kringlunni selur ekki golfbúnað. Tiger er golfkeppandi…. reyndar frekar góður.
Golfkúlur skulu góðkenndar af DíKót. Til þess að golfkúlur verði góðkenndar, þurfa þær að liggja í áfengi í að minnsta kosti í klukkutíma fyrir notkunn. Keppendur þurfa ekki að vera góðkenndir.
Ekki er æskilegt að golfarar spritti sig þegar inn á golfsvæðið er komið, slíkt gæti drepið golfbakteríuna.
Golfarar sem sinna heimilisofbeldi verða færðir úr stigamótaröðinni í Stígamótaröðina.
Tekið verður upp nýtt forgjafarkerfi fyrir árið í ár, sprittforgjafarkerfið. Það fer þannig fram að sprittun í ár verður útbyrðis en ekki innbyrðis eins og verið hefur undanfarin ár. Áréttist: Útvortis ekki innvortis.
Nái leikmaður fugli telst það sem refsistig vegna möguleika á fuglaflensu. Fyrir skolla eykur keppandi aftur á móti forgjöf sína þar sem skolli telst til fæðuöryggis og getur keppandi sótt um styrk til landbúnaðarráðuneytisins vegna þessa. Keppandi verður þó að éta skollann.
Ekki er mælt með golfspili á Glannavelli sökum nafnsins
Golfkúlur eiga að vera hvítar að lit. Í fyrra bar á því að einhverjir golfarar notuðu grænar kúlur. Starfsfólk vallanna er ennþá að detta um þær. Þær sjást ekki í grasinu.
Engu skiptir hvort keppendur skora brúttóskor eða nettóskor. Við brúttóskor er átt við CIF leiksins en ekki FOB. Muna, CIF en ekki FOB. Fyrir þá sem skilja þetta ekki er bent á reglubók GSÍ, síðu 245.
Þar sem mikil eftirsókn er á golfvellina verður tekið strangt á forgjöf til umsjónarmanna vallanna og slíkt tafarlaust kært sem mútur til YfirValda. Yfir Valdi tekur á málinu.
Verði keppandi vís að því að fara holu í höggi skal hann steinþegja yfir því. Í ljósi aðstæðna í þjóðfélaginu verður hann einn á vellinum og enginn mun trúa honum.
Sökum þess að keppandi er einn á ferð mun hann einn skrá sín stig og því nauðsynlegt að menn geri það með góðri samvisku… tí hí, góður þessi. Annar hvor keppandi er bankamaður. Restin lögfræðingar.
Tekin hefur verið upp sú regla að fylla upp í glompur eins og á golfvöllum Donalds Trump. Glompurnar verða áfram í höfði forsetans.
Fyrir trúaða skal það skýrt tekið fram að Vítasvæði valla hefur enga trúarlega skírskotun.
Talsvert hefur borið á því að fólk í Teigahverfi hefur orðið fyrir ónæði vegna golfspilara. Golfarar eru þess vegna minntir á að teigar eru á golfvöllunum sjálfum. Ítrekað: Á VÖLLUNUM SJÁLFUM
Í ljósi alvarleika þess sem er að gerast í þjóðfélaginu er bannað að gera grín á gríni.
Einungis er leyfilegt að nota eina kylfu á vellinum, pútter, eða put air eins og þeir segja á úndlensku.
Kylfur keyptar í Góða Hirðinum eru ekki leyfðar á Grafarholtsvelli.
Bannað er að koma með eigin holur á golfvöllum á Íslandi.