GSS: Úrslit úr kvennamóti GSS 2020

Kvennamót GSS fór fram í sólinni á Hlíðarendavelli á Sauðárkróki, í dag, laugardaginn 4. júlí 2020.

Þetta er sautjánda árið í röð sem þetta, eitt allra flottasta kvennmótið í golfi hérlendis, er haldið.

Kylfingar glímdu við vind úr ýmsum áttum en skarðagolan var þó áberandi.

Völlurinn skartaði sínu fegursta, blómum skreyttur og snyrtilegur í alla staði.

Fallega blómum skreyttir teigar á Hlíðarendavelli í árlegu kvennagolfmóti GSS 2020 og fagur Skagafjörðurinn í baksýn. Mynd: GSS

Um 50 konur mættu til leiks og heppnaðist mótið vel.

Konur í klúbbnum hjálpast að við undirbúning og utanumhald mótsins en mótið er styrkt af fjölda fyrirtækja í Skagafirði og víðar.

Verðlaunaborðið í kvennamóti GSS 2020 svignaði að venju undan glæsilegum vinningum. Mynd: GSS

Að vanda svignaði verðlaunaborðið undan glæsilegum verðlaunum og vill GSS færa styrktaraðilum  hjartans þakkir fyrir stuðninginn.

Texti að hluta: Anna Lilja Jónsdóttir.

Myndir: GSS