Ragnheiður Jónsdóttir | mars. 26. 2012 | 20:00

Viðtalið: Sergei Revinenko frá Rússlandi

Í gær birtist grein hér á Golf1.is um báða golfvelli Kazakhstan, Nurtau og Zhailjau. Já, vellirnir eru bara tveir í stærsta landlukta ríki heims.  Og þeir eru ekki öllu fleiri Rússlandi s.s. fram kemur í viðtali kvöldsins, við eiganda einu golfferðaskrifstofu Rússlands, Sergei Revinenko.  Farið var að spila golf í Rússlandi 2 árum fyrr  en í Kazakhstan, þ.e. árið 1989. Merkilegt að í einu fjölmennasta ríki heims (en í Rússlandi er talið að um 1050 milljónir búi)  skuli aðeins vera 15 golfvellir og 2 sem verið er að byggja!

Ég var svo heppin að fá að spila golf við Sergei Revinenko í ferð í boði ferðamálaráðs Cádiz héraðs dagana 3.-5. maí s.l. sem lauk með þátttöku í Cádiz Cup á Arcos Gardens 5. maí 2011.

Tekin voru 7 viðtöl við þátttakendur Cádiz Cup og hafa 4 nú þegar birtst. Hin 3 viðtölin birtast hér á næstu dögum og fer það fyrsta hér í kvöld:

Sergei og blómahafið á San Roque golfvellinum í Cádiz. Mynd: Golf 1.

Nafn: Sergei Revinenko.

Hvar fæddistu? Kharkov, í Ukraínu, 5. ágúst 1948.

Hvar ertu alinn upp? Í Moskvu.

Hverjar eru fjölskylduaðstæður og spilar einhver í fjölskyldunni golf?  Ég er kvæntur og á 1 son. Við spilum öll golf.

Hvenær byrjaðir þú í golfi? Árið 2005.

Hvað varð til þess að þú byrjaðir í golfi? Það var hrein tilviljun. Ég fór að selja golfferðir og fannst ég verða að hafa einhverja þekkingu á golfi.

Sergei og endurnar á Costa Ballena. Mynd: Golf 1.

Hvað starfar þú? Ég er eigandi einu golfferðaskrifstofu Rússlands.

Hvað telur þú að séu margir kylfingar í Rússlandi og hverjir eru vinsælustu golfáfangastaðirnir utan Rússlands? Ætli það séu ekki svona 6000 kylfingar í Rússlandi og þeir staðir sem eru vinsælastir eru Jamaíka, Tyrkland, Spánn, Ítalía, Malasía og Thaíland. Svo er eitthvað um ferðir til Egyptalands.

Hvort líkar þér betur við skógar- eða strandvelli? Báða – mér finnst skógarvellir skemmtilegir en er vitlaus í linksarana.

Hvað eru margir golfvellir í Rússlandi? Sergei hélt að þeir væru 10 (fimm 18 holu og fimm 9 holu)  – en skv. upplýsingum Golf1.is eru þeir nú 15 og verið að byggja 2 (enda ár síðan viðtalið við Sergei var tekið).

Hver er besti golfvöllurinn í Rússlandi?  Tseleevo Golf & Country Club. (Innskot: Hann er hannaður af Jack Nicklaus – sem sjálfur telur hann vera einn af 10 bestu golfvöllum, sem hann hefir hannað).

Frá Tseleevo golfvellinum nálægt Moskvu.

Hver er elsti golfklúbbur í Rússlandi?  Það er Moscow City Golf Club á  Dovzhenko götu, en hornsteininn að þessum fyrsta velli lagði hokkíleikmaðurinn sænski, Sven Tumba Johanson, 15. september árið 1987.

Hvernig gerist fólk félagar í golfklúbbum í Rússlandi?  Í raun er það skv. boði eða meðmælum – þetta er enn talin íþrótt heldri manna og ekki almenningsíþrótt og erfitt að sannfæra fólk um að þetta sé fjölskylduíþrótt sem góð sé fyrir heilsuna í staðinn fyrir íþrótt, sem frátekin er fyrir elítuna.

Hver er uppáhaldsgolfvöllur/vellir þinn/þínir hvar sem er í heiminum? Það er Halmstad völlurinn í Svíþjóð; völlurinn við European PGA Club á Írlandi og í raun írskir linksarar s.s. Doonbeg.

Hver er sérstæðasti golfvöllur sem þú hefir spilað á og af hverju?  Wild Coast Sun GC í Suður-Afríku vegna kaddýana og kvennanna þar.

Wild Coast Sun GC í Suður-Afríku - sérstæðasti golfvöllur, sem Revinenko hefir spilað

Hvað ertu með í forgjöf? 26.

Hvert er lægsta skorið þitt í golfi og hvar/á hvaða velli náðir þú því? 95 högg á Pirogovo golfvellinum í Moskvu-borg.

Hefir þú tekið þátt í öðrum íþróttum?  Já, körfubolta og tennis.

Hver er uppáhaldsmaturinn þinn, uppáhaldsdrykkurinn þinn, uppáhaldstónlistin þín, uppáhaldskvikmyndin þín og uppáhaldsbókin þín? Uppáhaldsmaturinn er Pirogi; uppáhaldsdrykkurinn er te með sítrónu; uppáhaldstónlistinn er jazz og klassík t.d. Rachmaninov; ég á enga uppáhaldskvikmynd og uppáhaldsbókin er „Psychology of Golf“ eftir Bob Rotella.

Hverjir eru uppáhaldskylfingarnir nefndu 1 kvenkylfing og 1 karlkylfing? KK: Pádraig Harrington.  KVK:  Sörenstam – ég hef heyrt mikið um hana og mér líkar afstaða hennar til íþróttarinnar.

Hvað er í pokanum hjá þér og hver er uppáhaldskylfan þín? Í pokanum hjá mér er TaylorMade dræver; Odyssey pútter; Pine Meadow járn, ég tek Adams rescue kylfur fram yfir tré. Uppáhaldskylfan er PW-ið mitt.

Hvert er meginmarkmiðið í lífinu? Ég vildi gera allt til þess að sonur minn verði hamingjusamur.

Hvað finnst þér best við golfið? Það er margt eins og t.d. göngutúrinn sem maður fær sér í náttúrunni og nýir áfangastaðir, það er hægt að fylgjast með villtri nátúrunni og ríku dýralífi t.d. mismunandi fuglategundum og í Nepal þar sem ég spilaði golf umkringdur öpum og dádýrum.

Á morgun hefst ný greinaröð hér á Golf1.is, þar sem fjallað verður um golfvelli í Rússlandi.