Golfútbúnaður: Tauvasaklútar

Í leit að skemmtilegum golfgreinum handa lesendum Golf 1 rekst maður á ýmislegt á netinu …. margt varla birtingahæft.

Golfútbúnaðargrein skyldi það vera en samt eitthvað eitthvað avant garde, eitthvað sem brýtur upp hversdagsleikann, ekki alltaf greinar um nýjasta golfskóinn, kylfur eða golfbolta…. þó þær séu góðra gjalda verðar.

David Owen skrifaði nú nýlega ágætis grein í Golf Digest um nauðsyn þess að vera með tauvasaklúta í golfsettum að hausti og vetrum. Var hann þeirrar meiningar að þeir ættu eiginlega að vera staðalútbúnaður í hverju setti, þegar flensur, magakveisur, hiti, kuldi og kvef tækju völdin.

David þessi býsnaðist yfir kleenex bréfvasaklútunum og það hversu ógeðfellt það væri þegar þeir fykju um golfvellina eftir notkun og klesstust við kerruna hans. Hann sagðist reyndar oft fremur hafa reynt að finna hreinan stað á annars skítugu golfhandklæði sínu og snýtt sér duglega í það, í staðinn fyrir að nota bréfþurrku.

Ooooojjjjj…..!!!!?!!!!? Ekki beinlínis snyrtipinni á ferð þar!!!!

Hann kemst reyndar að nokkuð merkilegri niðurstöðu þar sem hann segir tauvasaklúta hafa dotttið úr tísku en vera góða fyrir golfara.

Og það leiðir hugann að enn annarri hugmynd nefnilega þeirri að það eru nú nákvæmlega 3 mánuðir til jóla og ekki seinna að vænna að fara að huga að jólagjöfunum.

Þið ykkar sem eruð handlagin gætuð e.t.v. farið að huga að því að búa til handunninn golfvasaklút handa golfelskunum ykkar, t.d. með upphafsstöfum hans/hennar/þeirra eða skemmtilegum munstrum, af golfboltum, kylfum, golfpokum eða heimatilbúnu skjaldarmerki.  Gott tækifæri til að rifja upp knipplingagerð…. Um að gera að gefa hugmyndadísinni í ykkur lausan tauminn og búa til fallega, umhverfisvæna jólagjöf með miklu notagildi! 🙂