Kylfingar 19. aldar: nr. 14 – Beatrix Hoyt

Beatrix Hoyt (f. 5. júlí 1880 – d. 14. ágúst 1963) var bandarískur meistari áhugamanna í golfi. Beatrix Hoyt er 3. yngsti kylfingurinn til þess að sigra á United States Women´s Amateur Golf Championship og er ein af aðeins 5 til þess að sigra mótið 3 sinnum í röð.

Beatrix Hoyt 1889

Beatrix fæddist í Westchester County, New York og er barnabarn Salmon P. Chase (1808-1873), sem var fjármálaráðherra í stjórn Lincoln forseta, sem síðar varð dómstjóri (ens.: Chief Justice) við Hæstarétt Bandaríkjanna.

Beatrix byrjaði 14 ára að spila golf en hún var félagi í Shinnecock Hills Golf Club í Southampton, New York, sem hvatti unglinga og konur til þess að byrja í golfi. Hún var aðeins 16 ára þegar hún sigraði á United Women´s Amateur Golf Championship og hélt hún þessu aldursmeti þar til Laura Baugh sló það árið 1971. Hún vann mótið næstu tvö ár, eins og áður segir. Hún var líka sú af konunum sem var með lægsta skorið á úrtökumótinu fyrir aðalmótið og hélt því 5 ár í röð. Árið 1896 var 2. árið sem mótið var haldið og það fyrsta sem Robert Cox bikarinn var afhentur sigurvegaranum þ.e. Beatrix Hoyt.

Með félaga sínum William Sands vann Beatrix blandaðan fjórmenning í Westchester Country Club árið 1897. Aðeins 19 ára að aldri hætti hún að keppa í golfi eftir að hún tapaði fyrir Margaret Curtis í undanúrslitum í mótinu árið 1900 og vann alla ævi sem höggmyndasmiður og sem málari landslagsmynda. Beatrix átti langa og góða ævi, dó 83 ára.