Myndasería og úrslit: Horft tilbaka yfir íslenska golfsumarið – Listagolf GS-kvenna, 26. júní 2011

Sunnudaginn 26. júní í sumar fór fram í þriðja sinn listagolf GS-kvenna í alveg ágætis “Leiru-logni” á Hólmsvelli í Keflavík.  Það var frekar skýjað, sólin gægðist fram af og til og það var ekkert allt of hvasst, en þátttakendum í mótinu fannst að e.t.v. hefði mátt vera aðeins hlýrra.  Hólmsvöllur var þurr, svo þurr að sums staðar var erfitt að reka tíin niður og völlurinn því í þörf fyrir vökvun. Flatirnar voru ekki orðnar eins hraðar og maður er vanur í Leirunni, en því var bara fremur köldu árferði um að kenna. Leiran var í eins góðu standi og mögulegt var miðað við hvernig veðráttan var búin að vera.

Nestinu var stolið af mávi af þessum þátttakanda í Listagolfi GS-kvenna.

Nokkuð merkilegur atburður átti sér stað í upphafi móts, sem Golf1 varð vitni að í beinni. Þegar einn þátttakandinn í mótinu var að taka golfkerru, poka og annan nauðsynlegan útbúnað úr farangursrými bíls síns, kom máfur aðvífandi og stal brauðsneið sem konan var búin að smyrja sér í nesti. Mynd náðist af sökudólgnum og birtist hún hér fyrir neðan, þar sem hann er að gæða sér á ránsfeng sínum!

Listagolf GS-kvenna er eitt alflottasta kvennagolfmót á Íslandi og þótt víða sé leitað. Mótið er þríflokkaskipt; keppt er í þremur forgjafarflokkum  0-14; 14,1-25 og 25,1-36, en keppnisfyrirkomulag er punktakeppni með forgjöf. Verðlaun eru veitt fyrir 3 efstu sætin í hverjum forgjafarflokki.  Í verðlaun í hverju listagolfmóti eru verk eftir listakonur á Suðurnesjum. Listakonur sem styrktu listagolfið í ár með verkum sínum voru m.a. Bagga, Sigurbjörg Gunnarsdóttir (f. 1946) frá Keflavík (en skoða má verk hennar á vefslóðinni www.bagga.is);

Til þess að sjá myndaseríu úr mótinu smellið hér: LISTAGOLF GS-KVENNA 2011

Helstu úrslit í Listagolfi GS-kvenna 2011 voru eftirfarandi:

Forgjafarflokkur 0-14

1. sæti Íris Dögg Steinsdóttir, GS, 33 pkt.

2. sæti Erna Valdís Ívarsdóttir, GKG, 31 pkt.

3. sæti Erla Þorsteinsdóttir, GS, 30 pkt.

Forgjafarflokkur 14,1-25

1. sæti Ragnheiður Jónsdóttir, GK, 39 pkt.

2. sæti Þóranna Andrésdóttir, GS, 37 pkS

3. sæti Sigurbjörg Jóna Gunnarsdóttir, GS, 35 pkt.

Forgjafarflokkur 25,1-36

1. sæti Sjöfn Olgeirsdóttir, GS, 41 pkt.

2. sæti Þorgerður Aradóttir, GS, 40 pkt.

3. sæti Sigurfríð Rögnvaldsdóttir, GS, 35 pkt.