ALPG & LPGA: Sarah Kemp og Stacy Lewis leiða á Women´s Australian Open

Það er heimakonan Sarah Kemp (sjá kynningu á Söruh hér á Golf1 í dag) og bandaríska stúlkan Stacy Lewis sem leiða eftir 1. dag á Women´s Australian Open, sem hófst í dag. Báðar spiluðu á -4 undir pari, 69 höggum. Sarah sýndi mikinn stöðugleika, spilaði skollafrítt og fékk 4 fugla en meiri sviptingar voru í leik Stacy, sem fékk 2 skolla og 6 fugla.

Stacy Lewis leiðir á Women´s Australian Open ásamt heimakonunni Söruh Kemp.

Þriðja sætinu deila nr. 1 í heiminum Yani Tseng, frá Taíwan, bandaríska stúlkan Britany Lincicome og Julieta Granada frá Paraguay, en þær þrjár eru aðeins 1 höggi á eftir forystukonum dagsins, á -3 undir pari, 70 höggum hver.

Fimm stúlkur deila 6 sætinu á -2 undir pari, 71 höggi, þ.á.m. þýska W-7 módelið Sandra Gal.

Aðrar sem gaman er að fylgjast með er nýliði og kylfingur ársins á LET 2011, Caroline Hedwall, hún spilaði á parinu. Stelpan, 14 ára, Lydía Ko er með á mótinu og spilaði á +1 yfir pari, 74 höggum, alveg eins og átrúnaðargoð hennar Lexi Thompson, Þetta er aldeilis flott hjá Lydíu á móti öllum toppkanónum kvennagolfsins.

Nokkra athygli vekur hversu illa norska frænka okkar Suzann Pettersen, líka kölluð Tutta, fer af stað. Hún er í einu af neðstu sætum mótsins, eftir hring upp á +7 yfir pari, 80 höggum.

Til þess að sjá stöðuna eftir 1. dag á Women´s Australian Open, smellið HÉR: