Bandaríska háskólagolfið: Valdís Þóra varð í 4. sæti á Cards Challenge mótinu

Valdís Þóra Jónsdóttir, GL og Texas State varð í gær í 4. sæti á Louisiana Cards Challenge mótinu, líka nefnt Sir Pizza Cards Challenge, en mótið var 2 daga mót, sem fór fram 27.-28. febrúar á golfvelli Weston Hills Country Club, nálægt Miami, í Flórída. Valdís Þóra og liðsfélagi hennar Iman Nordin deildu reyndar 4. sætinu ásamt 2 kylfingum úr sigurliði mótsins, þeim Önu Menendez og Amöndu Baker úr Norður-Karólínu háskóla. Valdís Þóra og Iman léku best allra í Texas State liðinu.

University of Louisville var gestgjafi mótsins.

Alls spilaði Valdís Þóra á +3 yfir pari, samtals 219 höggum (74 70 75) . Texas State varð í 2. sæti en alls tóku lið 14 háskóla þátt í mótinu (þ.e. Louisville, Missouri, Texas State, Kansas, NC State, Florida International, Cincinnati, Miami, UNCW, South Florida, Memphis, East Tennessee, Delaware og Southern Mississippi). Norður-Karólíu háskóli varð í 1. sæti og lið University of Miami í 3. sæti.

Valdís Þóra og félagar settu skólamet, en heildarskor liðsins á lokahringnum var +1 högg yfir pari eða 289 högg, en þetta er besta skor liðsins frá byrjun. Heildarskor liðsins í mótinu var 880 högg, sem er besta skor liðsins frá því það tók þátt í bandaríska háskólagolfinu.

Til þess að sjá úrslitin á Louisiana Cards Challenge mótinu, líka nefnt Sir Pizza Cards Challenge mótið smellið HÉR: