Christina Kim verður með á Indlandi

Á föstudaginn n.k., 9. desember 2011, hefst Hero Indian Women´s Open á Indlandi. Þetta er í 2. sinn sem mótið er haldið í samstarfi við LET (Ladies European Tour) þ.e. Evrópumótaröð kvenna. Meðal þátttakenda í mótinu, þar sem verðlaunaféð er $ 300.000 er hin litríka Christina Kim, en þetta er í fyrsta sinn sem hún kemur til Indlands. Meðal annarra þátttakenda eru Laura Davies, Sophie Gustafsson, Lee-Anne Pace, Pornanong Phatlum (hún er ein skærasta stjarnan í kvennagolfinu í Asíu) Gwladys Nocera og nýliðinn á LET, sem heldur betur er búin að slá í gegn í ár, Caroline Hedwall.

Stuðboltinn Christina er þekkt fyrir heimspeki sína „Go big or go home” (þ.e. taktu áhættu eða farðu heim), þannig að það verður gaman að fylgjast með því hvað hún gerir á Indlandi. Hún segist hlakka til að koma til Indlands, en þaðan heldur hún til Dubai, þar sem hún varð 4. á síðasta ári á -6 undir pari, samtals 284 höggum, 5 höggum á eftir sigurvegaranum Iben Tinning frá Danmörku.