Evróputúrinn: Matteo Manassero leiðir á Open de Andalucia

Matteo Manassero, er enn aðeins 18 ára, en engu að síður er hann í 1. sæti af 144 keppendum á þessu lítt stjörnum prýdda móti Evrópumótaraðarinnar, Open de Andalucia, sem enginn annar en Miguel Angel Jiménez er gestgjafi á.

Matteo spilaði Aloha golfvöllinn í Marbella á – 8 undir pari, 64 höggum og er sem segir í efsta sæti þó enn eigi nokkrir eftir að ljúka leik og sætisröðun gæti raskast. Úrslitafrétt birtist á Golf1 síðar í kvöld.

Matteo fékk 9 fugla og 1 skolla og er með forystuna sem stendur; á 3 högg á Eduardo de la Riva frá Spáni og Hennie Otto frá Suður-Afríku, sem spiluðu á 68 höggum. Tommy frá Svíþjóð og Tommy Fleetwood eru síðan búnir að spila á 69 höggum.

Gestgjafinn, Miguel Angel Jiménez og Robert Rock, sá sem hafði betur í viðureigninni gegn Tiger Woods í Abu Dhabi í janúar eru síðan á 70 höggum.

Það var einmitt á Spáni fyrir 2 árum sem Manassero varð yngstur til að sigra mót á Evrópumótaröðinni.

„Völlurinn líkist Castellon, kannski aðeins hæðóttari,“ sagði Matteo.

„Maður þarf að halda boltanum í leik og síðan standa sig vel á flötunum. Þetta er völlur sem hentar mér mjög vel.“

Sem stendur er Manassero í 63. sæti á heimslistanum og hefir enn tækifæri til þess að koma sér meðal efstu 50 til þess að vinna sér sæti á Masters sem fram fer á Augusta National í næsta mánuði.

Hann spilaði á Masters 2010, sem sigurvegari British Amateur og stóð sig ágætlega s.s. allir muna, varð í 36. sæti.

Táningurinn frá Veróna er þegar búinn að sigra tvívegis á Evróputúrnum – hann hafði betur gegn Rory McIlroy s.l. apríl á Maybank Malaysian Open.

Kletturinn, Róbert Rock hefir líka hug á að vinna sér inn keppnisrétt á Masters en hann er sem stendur nr. 56 á heimslistanum. Sigur nú á sunnudaginn myndi koma honum meðal efstu 50 á heimslistanum, sem allir hafa keppnisrétt á Masters.

En takist það ekki er enn hægt að bæta stöðuna á Trophée Hassan II í Marokkó í næstu viku, en það er allra síðasti sjéns að tryggja sér farmiða á Masters.

Golf 1 hefir verið með kynningar á Rock og Manassero sem lesa má hér:

Robert Rock

Matteo Manassero I

Matteo Manassero II

Matteo Manassero III

Matteo Manassero IV

Matteo Manassero V

Sjá má stöðuna á Open de Andalucia Costa del Sol, eftir 1. dag, með því að smella HÉR: 

Heimild: europeantour.com (að hluta)