Frá Golfklúbbi Siglufjarðar eftir Jóhönnu Þorleifsdóttur, formann GKS

Í góðum pistli í Hellunni fer Jóhanna Þorleifsdóttir, formaður Golfklúbbs Siglufjarðar yfir starfsemi klúbbsins árið 2011. Í grein hennar segir:

„Starfið hjá GKS var með hefðbundnum hætti í sumar. Klúbburinn hefur haft þann sið að halda 2 golfmót í viku þ.e. helgarmót og 10 móta mótaröð á miðvikudögum, sem Rauðka styrkti nú í ár.  Sigurvegari í mótaröðinni varð Róbert Haraldsson. Hefur þetta mótafyrirkomulag gefið góða raun og hafa um og yfir 20 manns verið að mæta að meðaltali í hvert mót. Nokkur fjölgun hefur verið í félaginu og eru sumarhúsaeigendur og brottfluttir Siglfirðingar að ganga í klúbbinn.

Yfir 20 mót voru haldin í sumar. Keppt var í holukeppni. Keppt var í holukeppni í fyrsta skipti og þar vann Kristín Inga Þrastardóttir, eftir harða keppni við Róbert Haraldsson í úrslitum.

Jósefína og Þorsteinn - Klúbbmeistarar GKS 2011

Siglósport styrkti þjóðhátíðarmótið að vanda. Þar unnu hjónin Þorsteinn Jóhannsson og Jósefína Benediktsdóttir. Sú hefð hefir skapast að þeir félagar sem eiga stórafmæli sjái um og haldi Jónsmessumótið. Í ár voru 3 félagar 50 ára og stóðu þeir að framkvæmd mótsins. Sigurvegari mótsins varð Ólafur Þór Ólafsson. Tunnan prentþjónusta hefur staðið við bakið á okkur undanfarin ár, svo og Samkaup Úrval, Vodafone og KLM. Kári Freyr Hreinsson vann bæði Tunnu og Samkaups mótin og Jósefína Benediktsdóttir vann hjá Vodafone og Benedikt Þorsteinsson, KLM.

Frá Opna bakarísmótinu hjá GKS sumarið 2011

Stærsta mót sumarsins er verslunarmannahelgarmótið. Í ár voru keppendur 42. Aðalbakarí styrkti mótið. Sigurvegari varð Jóhann Már Sigurbjörnsson.

Meistaramót GKS fór fram um miðjan júlí. Leiknar voru 54 holur: Klúbbmeistarar urðu þau Jósefína Benediktsdóttir og Þorsteinn Jóhannsson.

Starf GKS hefur tvö síðustu ár gengið mikið út á harða baráttu félagsins fyrir nýjum golfvelli í Hólsdal. Nú fer trúlega að sjá fyrir endann á þeirri baráttu þar sem verið er komið í deiliskipulag.  Vonandi verður byrjað sem fyrst á að móta Hólsdalinn að þeirri útivistarparadís, sem fyrirhuguð er þar. Golfklúbburinn þakkar þeim sem hafa staðið við bakið á okkuð í þessari baráttu, sem hefur ekki verið auðveld. Einnig þakkar klúbburinn þeim fyrirtækjum, sem hafa styrkt okkur og félögunum fyrir samveruna í sumar. Hittumst hress með hækkandi sól.“

Jóhanna Þorleifsdóttir, formaður