Aðalfundur GOB: Gunnar Ingi Björnsson endurkjörinn formaður – félagsgjöld lækkuð

Aðalfundur GOB rekstrarárið 2010-2011 var haldinn mánudagskvöldið 12. desember 2011. Það sem hér fer á eftir má finna á góðri heimasíðu GOB, www.gob.is: „Alls mættu til fundar 19 félagsmenn og hlýddu á skýrslu stjórnar, yfirferð ársreikninga og tóku þátt í líflegum umræðum um starfsemi GOB , framtíð og rekstrarárið sem nú er að líða.

Reikningar klúbbsins voru samþykktir samhljóða enda rekstrarniðurstaða ársins mjög góð. Hagnaður var á eiginlegum rekstri klúbbsins upp á 2.783.098 krónur fyrir afskriftir og fjármagnsliðum. Rekstrargjöld klúbbsins voru 23.964.042 krónur utan afskrifta en rekstrartekjur 26.747.140 krónur. Eftir afskriftir ársins var bókfært tap á rekstri klúbbsins 1.562.322 krónur. Rétt er að taka fram að háar afskriftir af fasteignum og tækjum koma til vegna uppsafnaðar þarfar til afskrifta þar sem eignir klúbbsins hafa verið lítið sem ekkert afskrifaðar undanfarin ár.

Fjármagnsliðir klúbbsins voru jákvæðir um 9.882.803 krónur og því útkoma ársins eftir afskriftir og fjármagnsliði upp á 8.320.481 milljónir króna. Ræður þar mestu um endurfjármögnun langtíma lána klúbbsins en langtíma lán klúbbsins lækka á milli ára um rúmar átta og hálfa milljón. Skammtímalán klúbbsins lækka ennfremur um rúmar fjórar komma sjö milljónir. Heildarskuldir GOB eru því 28.658.205  krónur en voru 41.909.692 árið 2010. Lýstu fundarmenn yfir mikilli ánægju með þessa þróun ásamt reikningum í heild sinni ásamt því að búið sé að koma skuldamálum GOB í fastan farveg og þar með stöðugur rekstur klúbbsins tryggður.

Gunnar Ingi Björnsson var endurkjörinn formaður klúbbsins með öllum greiddum atkvæðum og er að hefja fimmta árið sem formaður GOB. Stjórn GOB starfsárið 2011-2012 skipa annars Kristinn Wium, Eyþór Ágúst Kristjánsson, Lýður Heiðar Gunnarsson og Þórður Ármannsson. Þórður kemur nýr inn í stjórn klúbbsins í stað Eiríks Jónssonar sem nú stígur til hliðar eftir 5 ára veru í stjórn GOB sem ritari stjórnar. Hlaut Eiríkur standandi lófaklapp fundarmanna fyrir störf sín í þágu GOB.

Farið var yfir starfsemi klúbbsins á árinu sem er að líða og fyrirspurnum félagsmanna svarað ásamt hefðbundum aðalfundarstörfum. Samþykktar voru lækkanir á árgjöldum fyrir almenna félagsmenn óbreytt árgjöld fyrir flesta aðra félagsmenn. Töluverðar breytingar voru samþykktar á árgjöldum félagsmanna:

GOB, 2. júní 2011. Mynd: Golf 1

Lækkanir á félagsgjöldum – nýr valmöguleiki um félagsaðild með takmarkaðri leikheimild

Samþykktar voru lækkanir á félagsgjöldum almennra félaga ásamt öðrum breytingum á gjaldskrá klúbbsins. Almennt félagsgjald í GOB verður 49.900 kr. fyrir árið 2012 en það er lækkun um tæpar 10.000 kr. á milli ára. Félagsgjöld 67 ára og eldri verða 39.000 eins og árið 2011 ásamt því að börn 7-13 ára greiða 19.000 sem er einnig sama gjald og 2011.

Fyrir árið 2012 býður GOB upp á nýjan valmöguleika í félagsaðild en það er félagsaðild með takmarkaðri leikheimild á 29.900 kr. Sú aðild felur í sér heimild til að leika Bakkakotsvöll fyrir kl. 14.00 á  virkum dögum og eftir kl. 16.00 um helgar. Innifalið eru félagsgjöld ásamt rétti til þátttöku í innanfélagsmótum klúbbsins, skráning hjá GSÍ og útgáfa forgjafar og með því leikheimild í opnum mótum annarra golfklúbba. Það er ljóst að golfíþróttin hefur tekið miklum breytingum undanfarin ár og er nú svo komið að eftirspurn eftir slíkri aðild er til staðar. Golfklúbbur Bakkakots býður þá kylfinga sem geta nýtt sér þennan valmöguleika velkomna í klúbbinn og á öll innanfélagsmót ásamt því að hafa aðgang að annarri þjónustu GOB.

Aðrar breytingar á félagsgjöldum í Golfklúbbi Bakkakots fyrir árið 2012 snúa að ungmennum og námsmönnum. Aldursbil gjaldhóps ungmenna var hækkaður úr 20 ára í 24 ára og er nú 14-24 ára. Sá hópur greiðir eins og undanfarin 2 ár 29.000 kr. Ennfremur var ákveðið að sami gjaldflokkur stæði námsmönnum til boða og því geta nú háskólastúdentar skráð sig í fulla aðild í GOB fyrir 29.000 kr.

Golfklúbbur Bakkakots býður alla nýja kylfinga velkomna. Starfsemi klúbbsins á komandi sumri verður kynnt félagsmönnum eftir áramót en hún verður með sama sniði eins og undanfarin ár.

GOB, 2. júní 2011. Mynd: Golf 1.

Reikninga klúbbsins má finna hér en fundargerð og skýrsla stjórnar fæst send til félagsmanna sem þess óska í tölvupósti á gob@gob.is.