Golfvellir í Rússlandi (5. grein af 9): Le Meridien Moscow CC

Armand Hammer, fyrrum forstjóri Occidental Oil Company gaf fyrrum forseta Sovétríkjanna gömlu, Leonid Brezhnev ráð hvernig laða ætti að erlent fjármagn og fjárfesta inn í landið. Hann sagði að til þess að lokka bandaríska fjárfesta yrði að sjá þeim fyrir þægilegum limmósínum og golfvöllum.

Gamla Sovétstjórnin skellti skollaeyrum við ráðinu og það var ekki fyrr en á 9. áratugnum með nýjum stjórnendum að golfleikur í Rússlandi var tekinn í sátt. Fyrsti golfvöllurinn sem byggður var, var eins og áður hefir komið fram á Golf 1 Moskow City Golf Club og það var sænski hokkíleikmaðurinn, Sven Tumba Johanson, sem lagði fyrsta hornsteininn að vellinum 15. september 1987.

Klúbbhús Moscow Country Club.

Moscow Country Club, sem nú er rekinn af Le Meridien hótelkeðjunni fylgdi fljótt í kjölfarið. Völlurinn er staðsettur í Nakhabino 25 kílómetra norðvestur af Moskvu og var hannaður 1993, að undirlagi rússneska utanríkisráðuneytisins. Hugsuðirnir á bakvið  völlinn voru Alexander S. Zinoviev, Ivan Sergyev og Antti Peltoniemi.

Völlurinn er á 300 hektara landareign, sem á er 131 herbergja 5 stjörnu Meridien hótelið, sem býður upp á öll þægindi lúxushótels: sundlaug, nuddstofu, sólarbekki, snyrtistofa, veitingastaða o.s.frv. Á staðnum er líka hægt að fara í squash eða blak eða á veiðar.

Vatn kemur við sögu á næstum helmingi allra brauta í Moscow CC sérstaklega á 576 yarda par-5 5. brautinni, sem er einkennisbraut staðarins.  Mikilvægt er að leika staðsetningargolf þar. Lenda verður boltanum í drævinu hægra megin við vatnið og annað höggið verður að slá vinstra megin við aðra vatnshindrun og innáhöggið er einnig yfir vatn.

Frá golfvelli Moscow CC - næstelsta golfvelli í Rússlandi.

Golfvallarhönnuðurinn var Robert Trent Jones Jr., sem ruddi golfvöllinn í gegnum birkiskóg og sagði um völlinn að hann: „væri hefðbundinn skógarvöllur byggður á klassískri strategíu með vatnshindrunum til þess að skapa völl sem verðlaunaði áhættu og gerði golfleikinn spennandi og skemmtilegan.“

Á Russian Open Golf Championship árið 2008 varð Joakim Bäckström 2. kylfingurinn á Evrópumótaröðinni það árið til þess að fá albatross og það var á Moscow CC golfvellinum. Hann fékk albatrossinn á 15. braut vallarins, sem er 561 yarda.

Upplýsingar:

Komast má á heimsíðuna HÉR: 

Heimilisfang: Le Meridien Moscow Country Club,

Nakhabino-1, Krasnogorsky District-

Moscor Region 143430 Russian Federation

Sími: +7 0 9592 65911