Jákvætt: Kaddý Tiger sást taka út Doral

Fréttamaðurinn Todd Lewis sagði í golfþætti Golf Channel Morning Drive í dag, að sést hefði til Joe La Cava, kylfusveins Tiger á Doral í gær, þar sem hann gekk um Bláa Skrímslið í Doral og var að taka breytta völlinn út.

Joe La Cava og Tiger

Þetta hefir verið túlkað sem jákvætt merki um að Tiger muni taka þátt í WGC-Cadillac Championship, sem hefst nú á fimmtudag, en Tiger dró sig sem kunnugt er úr Honda Classic mótinu eftir 13 spilaðar holur á lokahringnum sl. sunnudag og bar fyrir sig bakmeiðsli.

Aðspurður hvort Tiger tæki þátt í Cadillac mótinu, þar sem hann á titil að verja sagði hann: „Það er of snemmt að tjá sig um það. Ég þarfnast meðferðar á hverjum degi fram á fimmtudag til þess að halda verkjum í bakinu niðri. Við sjáum til hvað setur.“

Jafnframt hefir Tiger ekki afboðað blaðamannafund fyrir mótið á morgun (miðvikudag), þannig að það eru nokkur atriði sem benda til að hann muni taka þátt í WGC-Cadillac Championship!

Að því gefnu að bakið á Tiger verði í lagi….