LPGA: Sei Young Kim kylfingur ársins

Það er Sei Young Kim frá S-Kóreu, sem er kylfingur ársins á LPGA árið 2020.

Hver hlyti titilinn í ár, varð ekki ljóst fyrr en eftir lokamót LPGA, CME Group Tour Championship, sem lauk sl. helgi.

Inbee Park var búin að vera efst á stigalista LPGA, en með glæsilegum T-2 árangri á CME tryggði Kim sér titlinn. Inbee náði aðeins að verða T-35 í mótinu.

Við þetta hlaut Kim 118 stig á stigalista LPGA, en Inbee varð í 2. sæti með 112 stig.

Sei Young Kim sigraði í tveimur LPGA mótum 2020, þ.e. KPMG PGA risamóti kvenna og Pelican Championship presented by DEX Imaging and Konica Minolta og náði þar að auki 3 topp-10 áröngrum í viðbót þ.e. á  Diamond Resorts Tournament of Champions (T7), Gainbridge LPGA Boca Rio (5.) og Walmart NW Arkansas Championship presented by P&G (T5).

Eftir að ljóst var að Kim yrði leikmaður ársins sagði hún m.a. eftirfarandi í viðtali við fréttamann LPGA, aðspurð hvernig sér liði að hafa hlotið titilinn: „Mér líður vel. Ég er mjög stolt. Já þetta er frábært vegna þess að ég og Paul vinnum mikið og höfum verið frábær í ár. Ég er mjög þakklát öllum sem eru í kringum mig, eins og foreldrum mínum og svo þjálfara minum, herra Moon, og já og fjölskyldunni allri. Já, ég er mjög þakklát þeim öllum. “

Sei Young Kim var fyrir 5 árum, þ.e. 2015, valin Louise Suggs Rolex nýliði ársins.

Inbee Park hafnaði í öðru sæti á eftir Kim í valinu um „LPGA Rolex leikmann ársins“;  hlaut eins og segir 112 stig. Árið 2020 sigraði Park á ISPS Handa Australian Open mótinu og lauk árinu með sjö topp-10 áröngrum til viðbótar í 13 mótum, þar á meðal landaði hún þrívegis 2. sætinu þ.e. á Diamond Resorts mótinu, KPMG Women’s PGA Championship og Volunteers of America Classic.

Danielle Kang varð þriðja með 87 stig, eftir tvo sigra, þ.e. á LPGA Drive On Championship – Inverness Club og Marathon LPGA Classic presented by Dana ásamt þremur topp-10 áröngrum í viðbót.

Hin virta viðurkenning „Rolex leikmaður ársins“ var fyrst veitt af LPGA árið 1966.  LPGA kylfingar fá stig á hverju LPGA móti – sú sem sigrar flest og síðan fækkar stigunum eftir því sem neðar dregur. Stigahæsta stúlkan í lok keppnistímabilsins hlýtur síðan heiðursnafnbótina „Rolex leiðmaður ársins“ og glæsilegan bikar. Tvöföld sigurvegarastig eru veitt fyrir sigur í hverju af hinum fimm stóru risamótum LPGA – ANA Inspiration, KPMG Women’s PGA Championship, U.S. Women’s Open, AIG Women’s Open og the Evian Championship.

Aðalmyndagluggi: Sei Young Kim með „Rolex leikmaður ársins“ bikarinn.