Nýju strákarnir á Evróputúrnum 2019: Daníel Gavins (10/27)

Golf 1 hefir á undanförnum árum kynnt „nýju strákana“ á Evróputúrnum og verður því fram haldið hér.

Lokaúrtökumótið í ár fór fram á Lumine golfstaðnum í Tarragona, nálægt Barcelona á Spáni, dagana 10.-15. nóvember og voru að venju spilaðir 6 hringir.

Efstu 25 og þeir sem jafnir voru í 25. sætinu hlutu kortið sitt á Evróputúrnum. Í ár voru það 27 sem hlutu kortið sitt á Evróputúrnum.

Líkt og á undanförnum árum verður hafist á að kynna þá sem urðu í síðustu sætunum fyrst og endað á þeim sem sigruðu í Q-school þ.e. urðu efstir í lokaúrtökumótinu.

Í ár deildu 8 strákar 20. sætinu og komust því 27 „nýir strákar“ á Evróputúrinn í ár gegnum lokaúrtökumótið. Einn þeirra sem ekki komst að þessu sinni, þrátt fyrir frábæra spilamennsku var Birgir Leifur „okkar“ Hafþórsson, GKG.

Þeir 8 sem deildu 20. sætinu, þ.e. urðu T-20 hafa nú allir verið kynntir en það eru:  Kristian Krogh Johannessen, Filippo Bergamaschi, David Borda, Max Schmitt, Hugo León, Ben Evans, Kristoffer Reitan og Gavin Moynihan. Eins hefir sá verið kynntur sem einn hafnaði í 19. sæti en það var skoski kylfingurinn Marc Warren.

Í dag verður hafist handa við að kynna þá 6 kylfinga, sem deildu 13. sætinu en það eru enski kylfingurinn Daníel Gavins, áströlsku kylfingarnir Deyen Lawson og Nick Cullen, Guido Migliozzi frá Ítalíu, Per Langfors frá Svíþjóð og Louis DeJager frá S-Afríku.

Byrjað verður á Daníel Gavins en hann fæddist 20. mars 1991 í Leeds, Englandi og er því 27 ára.

Í dag býr hann í Pontefract í Yorkshire, Englandi og lærði golf sem krakki í Wheatley golfklúbbnum þar.

Gavins er 1,83 m á hæð.

Hann gerðist atvinnukylfingur 2012.  Allar götu síðan hefir hann tekið þátt í Q-school Evrópumótaraðarinnar, tvívegis með góðum árangri þ.e. 2015 og 2018 en í bæði skiptin fór hann í gegnum öll 3 stig úrtökumótanna.

Á árunum 2012-2014 spilaði Gavins á PGA Europro Tour, en hlaut undanþágu til að spila á Áskorendamótaröð Evrópu (Challenge Tour) árið 2014. Þar náði hann engum sérstökum árangri fyrsta ár sitt þar og var kominn aftur á Europro 2015, eftir að hafa tapað í bráðabana á lokamóti Áskorendamótaraðarinnar í október. En hann bætti svo sannarlega fyrir það því stuttu síðar tryggði hann í fyrsta skiptið kortið sitt á sjálfum Evróputúrnum og var nýliði þar árið 2016.

Utan vallar hefir Gavins áhuga á snóker, pool og squash og hann segist hafa miklar mætur á íþróttamönnunum Mark Selby, Judd Trump og Andy Roddick.