Nýju strákarnir á Evróputúrnum 2019: Guido Migliozzi (11/27)

Golf 1 hefir á undanförnum árum kynnt „nýju strákana“ á Evróputúrnum og verður því fram haldið hér.

Lokaúrtökumótið í ár fór fram á Lumine golfstaðnum í Tarragona, nálægt Barcelona á Spáni, dagana 10.-15. nóvember og voru að venju spilaðir 6 hringir.

Efstu 25 og þeir sem jafnir voru í 25. sætinu hlutu kortið sitt á Evróputúrnum. Í ár voru það 27 sem hlutu kortið sitt á Evróputúrnum.

Líkt og á undanförnum árum verður hafist á að kynna þá sem urðu í síðustu sætunum fyrst og endað á þeim sem sigruðu í Q-school þ.e. urðu efstir í lokaúrtökumótinu.

Í ár deildu 8 strákar 20. sætinu og komust því 27 „nýir strákar“ á Evróputúrinn í ár gegnum lokaúrtökumótið. Einn þeirra sem ekki komst að þessu sinni, þrátt fyrir frábæra spilamennsku var Birgir Leifur „okkar“ Hafþórsson, GKG.

Þeir 8 sem deildu 20. sætinu, þ.e. urðu T-20 hafa nú allir verið kynntir en það eru: Kristian Krogh Johannessen, Filippo Bergamaschi, David Borda, Max Schmitt, Hugo León, Ben Evans, Kristoffer Reitan og Gavin Moynihan. Eins hefir sá verið kynntur sem einn hafnaði í 19. sæti en það var skoski kylfingurinn Marc Warren.

Sex kylfingar deildu 13. sætinu en það eru enski kylfingurinn Daníel Gavins, áströlsku kylfingarnir Deyen Lawson og Nick Cullen, Guido Migliozzi frá Ítalíu, Per Langfors frá Svíþjóð og Louis DeJager frá S-Afríku. Gavins hefir þegar verið kynntur og í dag er það Guido Migliozzi.

Guido Migliozzi fæddist 25. janúar 1997 í Vincenza á Ítalíu og er því nýorðinn 22 ára. Hann er meðalmaður á hæð 1,8 m.

Í dag býr Migliozzi í Camisano Vicentino á Ítalíu og er í Montecchia golfklúbbnum, í Padúa, í heimalandinu.

Sem áhugamaður tók hann m.a. þátt í liðum Ítala í  Jacques Léglise Trophy 2015, Eisenhower Trophy 2016 og  St Andrews Trophy 2016.

Migliozzi gerðist atvinnumaður í golfi 2016.

Hann hefir átt mikilli velgengni að fagna í 3. deildinni í Evrópu, þ.e. á Alps Tour, þar sem hann sigraði þrívegis á árunum 2017 og 2018.

Migliozzi var líka fyrsti kylfingurinn til þess að verða skjólstæðingur umboðsfyrirtækis Niall Horan,  Modest! Golf.

Sem stendur er Migliozzi nr. 537 á heimslistanum.