Nýju strákarnir á Evróputúrnum 2019: Ivan Cantero Gutierrez (18/27)

Golf 1 hefir á undanförnum árum kynnt „nýju strákana“ á Evróputúrnum og verður því fram haldið hér.

Lokaúrtökumótið í ár fór fram á Lumine golfstaðnum í Tarragona, nálægt Barcelona á Spáni, dagana 10.-15. nóvember 2018 og voru að venju spilaðir 6 hringir.

Efstu 25 og þeir sem jafnir voru í 25. sætinu hlutu kortið sitt á Evróputúrnum. Í ár voru það 27 sem hlutu kortið sitt á Evróputúrnum.

Líkt og á undanförnum árum verður hafist á að kynna þá sem urðu í síðustu sætunum fyrst og endað á þeim sem sigruðu í Q-school þ.e. urðu efstir í lokaúrtökumótinu.

Í ár deildu 8 strákar 20. sætinu og komust því 27 „nýir strákar“ á Evróputúrinn í ár gegnum lokaúrtökumótið. Einn þeirra sem ekki komst að þessu sinni, þrátt fyrir frábæra spilamennsku var Birgir Leifur „okkar“ Hafþórsson, GKG.

Þeir 8 sem deildu 20. sætinu, þ.e. urðu T-20 hafa nú allir verið kynntir en það eru: Kristian Krogh Johannessen, Filippo Bergamaschi, David Borda, Max Schmitt, Hugo León, Ben Evans, Kristoffer Reitan og Gavin Moynihan. Eins hefir sá verið kynntur sem einn hafnaði í 19. sæti en það var skoski kylfingurinn Marc Warren.

Sex kylfingar deildu 13. sætinu en það eru enski kylfingurinn Daníel Gavins, áströlsku kylfingarnir Deyen Lawson og Nick Cullen, Guido Migliozzi frá Ítalíu, Per Längfors frá Svíþjóð og Louis de Jager frá S-Afríku. Tveir deildu síðan 11. sætinu, báðir á samtals 19 undir pari þ.e Masahiro Kawamura frá Japan og Scott Gregory frá Englandi. Þeir hafa nú allir verið kynntir.

Næst verða kynntir þeir sem deildu 9. sætinu en það voru sænski kylfingurinn Anton Karlsson og spænski kylfingurinn Ivan Cantero Gutierrez, en þeir léku hringina 6 á lokaúrtökumótinu á samtals 20 undir pari.  Byrjað verður á Ivan.

Ivan Cantero Gutierrez fæddist 30. janúar 1996 í Madrid á Spáni og er því 22 ára.

Gutierrez er 1,72 m á hæð.

Hann byrjaði í golfi 3 ára þegar frændi hans kom honum í kynni við golfið.

Á Spáni er Gutierrez í Llanes golfklúbbnum.

Gutierrez gerðist atvinnumaður í golfi 2017, eftir stjörnu áhugamannaferil, þar sem hann varð m.a. nr. 3 á heimslista áhugamanna.

Sem stendur er Gutierrez nr. 789 á heimslista atvinnumanna í golfi.

Hann reyndi þrívegis að komast á Evróputúrinn í gegnum Q-school, 2016, 2017 og 2018 tókst það í 3. skiptið og því spilar hann meðal þeirra bestu í Evrópu 2019.

Áhugamál Gutierrez utan golfsins er fótbolti.