Nýju strákarnir á PGA 2020: Scottie Scheffler (25/50)

Eins og á undanförnum árum mun Golf 1 kynna „Nýju strákana“ á PGA Tour. Nú verða kynntir „nýju strákarnir“ keppnistímabilið 2019-2020 til sögunnar, en það eru sem fyrr efstu 25 á peningalista Korn Ferry Tour eftir 2018-2019 keppnistímabilið og síðan þeir 25 sem stóðu sig best í síðustu 3 mótunum á mótaröðinni þ.e. í Korn Ferry Tour Finals.

Fyrst verða kynntir þeir 25, sem urðu efstir á stigalista Korn Ferry Tour eftir reglulega tímabilið og hlutu þannig kortin sín á mótaröð þeirra bestu, PGA Tour, fyrst var kynntur sá sem varð í 25. sæti og rétt slapp inn á mótaröðina og síðan endað á þeim sem landaði 1. sæti stigalistans, Scottie Scheffler, með 2935 stig.

Síðan verða kynntir þeir 25 sem komust á PGA Tour gegnum Korn Ferry Tour Finals.

Í dag verður tekið forskot á sæluna og aðeins farið út fyrir rétta röð í andstöðu við ofangreint – kynntur til sögunnar verður sá kylfingur, sem varð í 1. sæti eftir reglulega tímabilið, Scottie Scheffler, sem var með 2935 stig á stigalista Korn Ferry Tour. Ástæða þess að dansað er út úr réttri röð með að kynna „nýju strákana“ er að Xcheffler er þegar farinn að láta að sér kveða á PGA Tour og er í forystu eftir 1. dag á móti vikunnar á PGA Tour, A Military Tribute at the Greenbrier. Frábært er að sjá þá nýju slá í gegn þegar í fyrsta mótinu!!!

Scottie Scheffler fæddist 21. júní 1996 í Dallas, Texas og er því aðeins 23 ára. Hann veit það líklegast ekki, en Scottie á sama afmælisdag og íslenska golfdrottningin Ragnhildur Sigurðardóttir, GR og aðrir frábærir kylfingar m.a. Matt Kuchar, William McGirt, Sang Moon-Bae og Carly Booth og því virðist 21. júní vera afmælisdagur mikilla kylfinga!

Foreldrar hans eru Scott og Diane Scheffler og Scottie á 3 systur: Söru, Molly og Callie Scheffler.

Scottie var í Highland Park High School og síðan í bandaríska háskólagolfinu þ.e. lék með liði The University of Texas at Austin.

Scottie útskrifaðist frá Austin háskóla 2018 með gráðu í fjármálafræði (ens: finance) og gerðist þegar að loknu háskólanámi atvinnumaður í golfi.

Scottie brilleraði þegar í menntaskóla vann t.a.m. þrisvar sinnum í Texas State mótum, en Jordan Spieth er eini kylfingurinn, fyrir utan Scottie, sem hefir tekist það.

Scottie Scheffler spilaði í Opna bandaríska risamótinu 2017 og var með lægsta skor áhugamanns.

Scottie, eins og svo margir atvinnukylfingar í Bandaríkjunum styður góð málefni og styrktarmálefni hans eru krabbameinssjúk börn „Triumph Over Kid Cancer.“ Frábært að hafa svona góðan kylfing styðja svona verðugt verkefni!!!

Scottie Scheffler komst á Korn Ferry Tour 2019 og á nýliðaári sínu sigraði hann þegar í 2 mótum á mótaröðinni: Evans Scholars Invitational og Nationwide Children’s Hospital Championship og það er ástæðan fyrir að hann er kominn á bestu karlmótaröð í heimi aðeins 23 ára!!!

Og ekki bara það; hann er efstur ásamt 2 öðrum á fyrsta PGA Tour mótinu á 2019-2020 keppnistímabilinu: „A Military Tribute at the Greenbrier.“

Vá!!! Fullt af frábærum nýliðum að fylgjast með í ár og Scottie Scheffler svo sannarlega einn þeirra!!!