Nýju strákarnir á PGA Tour 2019: Hunter Mahan (42/50)

Eins og á undanförnum árum mun Golf 1 kynna „Nýju strákana“ á PGA Tour keppnistímabilið 2018-2019 til sögunnar, en það eru sem fyrr efstu 25 á peningalista Web.com Tour eftir 2017-2018 keppnistímabilið og síðan þeir 25 sem stóðu sig best í síðustu 4 mótunum á mótaröðinni þ.e. í Web.com Finals.

Nú hafa verið kynntir þeir 25, sem urðu efstir á peningalista Web.com Tour eftir reglulega tímabilið og hlutu þannig kortin sín á mótaröð þeirra bestu, PGA Tour, síðast var kynntur sá sem varð í 1. sæti peningalistans, Sungjae Im frá Suður-Kóreu.

Nú er aðeins eftir að kynna þá 25, sem urðu efstir á Web.com Finals og hlutu þannig þáttökurétt á mótum PGA Tour. Fyrst var kynntur sá sem rétt slapp í hóp þeirra 25 efstu en það var Jim Knous, síðan Fabián Gómez frá Mexíkó, kanadíski kylfingurinn Ben Silverman, bandarísku kylfingarnir Michael Hayes Thompson, Nicholas Lindheim, Wes Roach og Cameron Tringale, Curtis Luck (16. sæti) frá Ástralíu, Dylan Frittelli frá S-Afríku og Sepp Straka frá Austurríki; Stephan Jäger, sem varð í 15. sæti; Roberto Diaz, sem varð í 14. sæti ; Max Homa, sem varð í 13. sæti og Seth Reeves, sem var í 12. sæti.

Í dag verður kynntur sá sem var í 9. sæti á Web.com Tour Finals, en það er Hunter Mahan, sem vann sér inn 107,505 dollara á Web.com Finals.

Hunter Mahan fæddist 17. maí 1982 og er því 35 ára.

Mahan er 1,8 m á hæð.

Hann er kvæntur Kandi og eiga þau hjónakorn dótturina Zoe.

Mahan spilaði golf bæði í mennta- og háskóla, en hann var í McKinney High School og síðan í tveimur háskólum. University of Southern California og Oklahoma State University.

Mahan gerðist atvinnumaður 2003 og hefir verið á PGA Tour síðan þá. Hann hefir sigrað 6 sinnum á PGA Tour og 3 sinnum á öðrum mótaröðum.

Besti árangur Mahan í risamóti er T-4 árangur á Opna bandaríska árið 2013.

Mahan var m.a. í Golf Boys ásamt þeim Bubba Watson, Rickie Fowler og Ben Crane.

Meðal styrktaraðila Mahan eru Under Armour, Titleist, Ping, BioSteel Sports Supplements Inc., NetJets, FootJoy, Clubface Golf, RBC Golf Pigeon og Ace Hardware.

Mahan er ekki „nýr strákur“ á PGA Tour – gekk bara ekki sem skyldi 2018 og tók því þátt í Web.com Finals, með þessum líka fína árangri eins og við er að búast og tryggði sér þar með áframhaldandi þátttökurétt á PGA Tour.