Nýju stúlkurnar á LET 2014: Tessa Teachman (18/31)

Það var 31 stúlka sem komst í gegnum Lalla Aicha Tour School í Marokkó og hlaut kortið sitt á Evrópumótaröð kvenna, LET (Ladies European Tour).

Mótið fór fram dagana 14.-18. desember 2013 á golfvöllum Al Maaden og Samanah CC í Marrakech, Marokkó.  Leiknir voru 5 hringir  og eftir 4. hringinn var stúlkunum 92 sem upphaflega voru 94, fækkað niður í 60 og þar af hlutu 31 efstu eftir 5. og lokahringinn keppnisrétt á LET fyrir keppnistímabilið 2014.

Það voru 4 stúlkur sem deildu 15. sætinu (voru jafnar í 10.-14. sætinu) og komust inn á mótaröðina með skor upp á samtals 2 undir pari, 358 högg: Ariane Provot,  Kim Williams, Henni Zuel,  Rebecca Sörensen og Tessa Teachman.

Sú sem verður kynnt í kvöld er bandaríski kylfingurinn Tessa Teachman, sem varð í 14 .sætinu á eins og segir 358 höggum (67 71 72 73 75).

Tessa Teachman fæddist 3. október 1989 í Rochester, New York og er því 24 ára.  Hún byrjaði að spila golf 1. júní 1992, aðeins 2 ára. Það var pabbi hennar sem kom henni af stað í golfi og mestu áhrifin á hana í golfinu hefir golfþjálfarinn hennar, Rob Noel haft.

Tessa átti fremur farsælan feril sem áhugamaður en hún gerðist atvinnumaður í golfi 30. maí 2012. Þannig varð Tessa m.a. New York High School State Champion árið  2004; Louisiana High School State Champion árið 2007; PGA Jr. Series leikmaður ársins 2005;  hún var í AJGA Cannon Cup East Team Selection árið 2008; Tessa varð í 1. stæi á AJGA SAP Open 2007; Hún tók þátt í LPGA Corning Classic 2005 og 2008 og jafnframt  USGA Women’s Am 2005 og USGA Jr Girls Championship árin 2003, 2005 og 2007.

Tessa var í LSU (Louisiana State University) og útskrifaðist þaðan með BA gráðu í markaðs- og auglýsingafræðum. Hún spilaði jafnframt öll 4 árin í háskólagolfinu með golfliði LSU.  Meðal árangurs hennar  á háskólaárunum er eftirfarandi:

Tessa varð T-3 á NCAA Championship 2012
Hún var í NGCA All American liðinu 2012
Hún var í Golfweek All American liðinu 2010 og 2012
Hún var í All SEC 2nd Team 2010 og 2012
Hún var í SEC All Freshman liðinu 2009

Meðal hápunkta á ferlinum er  að hafa tekið þátt í US Women´s Open 2013 og orðið í 1. sæti á Reunion Resort mótinu sem er á Suncoast mótaröðinni.  Eins spilar Tessa nú á Evrópumótaröð kvenna, þar sem hún varð í 14. sæti á úrtökumótinu Lalla Aicha Tour School í Marokkó eins og áður segir.

Meðal áhugamála Tessu eru jóga, að elda, listir, tónlist og háskólaruðningsboltinn í Bandaríkjunum.