5 deyja eftir rifrildi á golfvelli

Sl. föstudag, 21. júní 2019, skaut maður að nafni Claude Adams, 64 ára, tvo menn á pitch og pútt velli Casa Grande Senior Mobile Estates, í Santa María, Kaliforníu, eftir rifrildi, sem braust út milli þeirra þriggja þarna á golfvellinum.

Fórnarlömbin voru Kurt Bracke, 70 ára og Richard Hanen, 78 ára.

Þessir þrír höfðu löngum eldað grátt silfur saman og hafði deila þeirra leitt til þess að Adams var vikið úr hjólhýsagarði, sem hann bjó í.

Fjölmargir nágrannar lýstu því að Adams, sem gekk undir viðurnefninu „The Bodie“ hefði átt í fjölda útistaðna í hjólhýsahverfinu, en honum lýst sem uppstökkum og árásargjörnum.

Einn nágranninn Keith Castro sagði að „þessir þrír náungar hefðu haft í hótunum hver við annan um langt skeið.“

Eftir að hafa skotið tvo menn á golfvellinum til dauða fór Claude Adams heim til sín og sprengdi heimili sitt í tætlur, en hann sjálfur lést í sprengingunni ásamt eiginkonu sinni Sherry, 65 ára og syni þeirra Seth, 33 ára.

Þingkkona Santa Maria City District 3, Gloria Soto, samhryggðist aðstandendum fórnarlambanna í yfirlýsingu á Twitter, en þar sagði m.a.:

„Þetta er sorgardagur í Santa Maria. Ég skuldbind mig til þess að vinna að staðbundinni stefnu sem mun tryggja öryggi íbúa okkar og fjölskyldna þeirra. Dýpstu samúðarkveðjur til fjölskyldna sem orðið hafa fyrir þessum harmleik í dag í Casa Grande Mobile Estates,“ skrifaði Soto m.a. sl. föstudag.